Në emisionin “Open” në News24 mbrëmjen e sotme po diskutohet në lidhje me zhvillimet e fundit mbi tensionet në veri të Kosovës.
I ftuar në studio, nënkryetari i Kuvendit të Kosovës Enver Hoxhaj ka deklaruar se pa dyshim burimi i dhunës në komunat në veri është Serbia dhe milicia fashiste e drejtuar nga Beogradi, por se është përgjegjësi e kryeministrit Albin Kurti që të dalë nga kjo situatë.
Ai ka shtuar se zoti Kurti po ndjek një politikë të gabuar për zgjidhjen e kësaj situate duke ndihmuar presidentin e Serbisë Aleksandër Vuçiç në synimet e tij. Sipas zotit Hoxhaj tashmë në dialogun në Bruksel nuk flitet më për marrëdhënie mes dy vendeve apo marrëveshje me qëllim njohjen e ndërsjelltë, por thjeshtë për menaxhimin e situatës në veri.
Pjesë nga diskutimi në studio:
Çfarë e ka shkaktuar krizën?
Hoxhaj: Është një situatë komplekse. Fakti që ngjarjet ndodhin në territorin e Kosovës, mendoj që përgjegjësinë për të dalë nga situata e ka zoti Kurti. Burimi i dhunës është Serbia është projektim i politikës serbe. Nuk bëhet fjalë kush qeveris në ato katër komuna por kush i kontrollon ato komuna në veri.
Beogradi ka ndjekur gjithmonë një politikë të ndarjes për këtë zonë.
Nuk dimë cilat janë qëllimet e zotit Kurti për Veriun. Natyrisht milicia fashiste e ka burimin në Serbi, por a do Kosova të përmbyllë shtetndërtimin e të integrojë zonën?
Nuk shoh qëllime politike të qeverisë dhe Kurtit, veprimet e bëra gjatë vitit të kaluar e që po bëhen tani, më shumë i shërbejnë Serbisë se sa është fuqizim i shtetësisë së Kosovës.
Zoti Kurti ka ndjekur politikë ka gabuar, po ndjek edhe politikë të gabuar me aleatët tanë. Ai flet tërë kohës për sovranitet, por kjo ka të drejta e detyrime. Ne e dimë çdo Vuçiçi e Serbia, por Kosova duhej të koordinohej me partnerët të arrinte një marrëveshje për njohje të ndërsjelltë.
Kurti merrej me targa kur në media doli plani franko-gjerman. Ai krijoi një situatë politike që lejoi Vuçiçin të bindë ndërkombëtarët të heqin dorë nga qëllimi përfundimtar i njohjes së ndërsjelltë. Serbia po bën përpjekje që të mos ketë fare dialog.
Tani nuk flitet më për marrëdhënie të ndërsjellta por si të menaxhohet situata në veri. Serbia dëshiron të përmbushë ambiciet territoriale me Veriun, të tregojë se qeveria nuk e qeveris dot këtë zonë, që Kosova nuk është shembull i mirë i shtet ndërtimit dhe kur ka sinjale të luftës hibride Serbia ka përdorur metoda diplomatike si të na godasë diplomatikisht, ka përdorur presionin psikologjik, dhe nëse e nisim bisedën me sanksionet që mund të merren ndaj Kosovës, kjo është fitore e Vuçiçit.
